L'EXODE OUBLIE
Juifs des pays arabes
Moïse Rahmani
Ed. Raphael
ISBN 2-87781-070-04
Muncho se tiene eskrito i avlado sovre la suerte de los refujiados palestinianos i de sus sufriensas, desde le duvieron abandonar sus kazas en 1948, en la mayoria de los kavzos en segito a las rekomendasiones de sus proprios lideres ke les asiguraron ke despues de la gerra i de la viktoria de las armadas arabas, eyos podrian retornar a sus kazas i resivirian mizmo, en kompensasion, laz kazas, tierras i bienes de los djudios ke serian "echados la mar".
Muy poko, a la kontra, se save sovre las sufriensas del serka de un milion de djudios ke bivian en los paizes arabos i la mayoria de los kualos fueron ovigdos a emigrar, ken el 1948 i ken en 1956 o mas tadre, deshando ayi sus kazas, sus magazenes i kaje todos sus bienes.
Moïse Rahmani, el mizmo refujiado ke, djuntos kon su famiya fue arondjado de Egipto en 1956, eksposa en este livro la trajedia ke fue, para todos estos djudios, la emigrasion forsada de paizes onde sus antepasados bivian desde miles de anyos, ainda antes ke yegaron los arabos i el islam.
El livro "L'exode oublié" viene djusta a tiempo, en una epoka en la kuala en munchas partes del mundo se esta enfuertesiendo el anti-djudaizmo basho la maska del anti-sionizmo. Rahmani deskrive la situasion de los djudios en estos paizes, desde Maroko en el oeste i asta Irak en el este, i de sus sufriensas, kuando tuvieron ke abandonar sus kazas i todo lo ke avian kreado en el paiz onde avian nasido i se avian engrandesido; i tambien al konsentirsen, de un dia al otro, sin patria, sin pasporto, sin ningun en el mundo - salvo Israel i las komunidas djudias - ke proteste i bushke a ayudarlos ; ma el aze esto sin bushkar a ensender onde el lektor sintimiuentos de odio i dezeo de vengansa, sino ke solamente afin ke muestras futuras jenerasiones sepan lo ke fueron las komunidades djudias en los paizes arabos ; para ke todos sus ermanos djudios, i sus primos arabos konoskan esta istoria, ke es la suya tambien.
Un livro muy interesante i ke su importansia sera realizada ainda mas kuando adelantaremos el el poseso de paz,i ke yegara la ora de tratar de las indemnidades a los refujiados palestinianos i a los djudios de los paizes musulmanos ke duvieron tambien abandonar sus kazas i todo lo ke tenian.
Moshe Shaul
|
