Beki Bardavid
L'EXODE OUBLIE, JUIFS DES PAYS ARABES , ansi ke LA REPONSE DE NOA
son los dos de alkavo livros de Moise Rahmani. Adriento de unos dos anios Moise publia el 5. i el 6. livro. Nombraremos los de antes, los kuatro livros de antes:
SEPHARAD 92
RHODES, UN PAN DE NOTRE MEMOIRE
SHALOM BWANA LA SAGA DES JUIFS DU CONGO
LES JUIFS DU SOLEIL PORTRAITS DE SEPHARADES DE BELGIQUE
i agora es el 5. i el 6. livro, las dos ovras ke nombrimos mas ariva:
L'EXODE OUBLIE, JUIFS DES PAYS ARABES, publiado por Editions Raphael LA REPONSE DE NOA , publiado por Editiones Sepharades Européen.
kon lo ke paso en Rhodes, en Congo, en Belgique, i agora en los Payizes Arabos.
Estos dos livros, ansi ke todos los otros ya se enkontran en las librerias.
Moise Rahmani pensa ke es por la primera vez ke la historia de un milion de Djudios echados de sus payizes o ovligados a partir, i sovre todo de una manera dramatik, es kontada kon los ke bivieron esta historia.
L'EXODE OUBLIE ke se publio entre Las Editiones Raphael publiaron este livro presiozo, kon la prefasa de Alexandre Del Valle i un antepropos de François Zimeray, deputado evropeo. Tenemos tambien la eskrita del Dr. Avi Beker, sekretario jeneral del Congres Juif Mondial.
LA REPONSE DE NOA, tiene un Avant-propos de Philippe Monsfils i la Prefasa de Viviane Teitelbaum Hirsch, dos eskritas maraviyozas onde Rahmani es nombrado "Troubadour de la Memoire", porke vedra ke todos los livros de Moise salieron a luz para ke ningunos se olviden le ke paso en Rhodes, en Congo, en Belgique, i en los Payizes Arabos.
" Estas personas me izieron el plazer de eskrivir por mi livro. Ya vaj a enkontrar los tekstos de estas personas i una prezentason de la ovra " , dize Moise Rahmani.
Moise Rahmani dedikaso su livro L'EXODE OUBLIE a:
940.000 Djudios ovligados a espartirsen o echados de sus payizes.
A sus kreaturas, inyetos i biz-inyetos, para ke no se olviden.
A mis parientes Victor i Ines, todos los dos esten en ganeden, ke fueron ovligados de salir.
A David, Clémy i Rony, mis amigos de chikes, ke la kerensia egziste, malgrado la espartision.
A Meno ke la espartision me dio la okazion de konoserlo ansi ke a los dos Edouard...
LA REPONSE DE NOA lo dedikaso a sus inietos ke los kere muncho.
Ya savemos ke Moise Rahmni eskrive kon proza-lirik i ke kaji todo Djudio del mundo se enkontra en sus livros. Tiene una vibrasion ke mos suve al garon, i una emosion ke se enstala en el korason.
En L'EXODE OUBLIE, Rahmani toma los payizes Arabos uno por uno i mos konta kon faktos, kon datas, kon shifros todo lo ke les afito a los Djudios ke biven en estos payizes...
Tenemos l'Algérie, Aden, Egipto, Irak, Liban, Libye, Maroc, Palestine, Syrie, Tunisie, Yemen i unas kuantas otras diversas notas. Mos dize la prezentasion del livro:
Moise Rahmani es uno ke fuyo del Egipto. Su famiya forsada de salir en l956, emigra en Congo ex-belge. No son solamente los Palestinianos ke tienen esta mala suerte, son tambien los Djudios de los payizes Arabos ke estan martirizados i biven una vida sin amanyana.
Ya savemos porke ya vimos en sus livros ke Moise Rahmani eskrive kon un pendola ke mos emosiona kon su styl. En sus fraze ay una muzika ke suve de kada linya.
Portanto esta vez Moise mos esta apaniando de otra manera. Es un boz triste, un tono muy desidado sin ninguna rezerva. Rahmani eskrive en mirandomos custo ariento los ojos i no
solamente a estos tantos Arabos ke bivian en sus tierras. Rahmani mos mira i a mozos de una manera serioza. Es en esta Repuesta de Noa ke Moise mos esta dando un tablo klaro i yeno de luz del antisemitizmo, de la dezenformasion, kon shifros, kon datas, kon fotos,.. kon todo modos de provas bivas. Nada no es supozision en estos dos livros maraviyozos de Moise Rahmani. Todos los dos livros vo lo dire, se meldan kon una fasilitad i una prestes ke asigun lo empesaj ya puedej apaniar la demanyana.
Hazak Baruh a Moise Rahmani i Vidas Largas para mas produizir.
Vidas Largas a mozos para meldarlo.
