Shalom - Haftalik siyasi ve Kültürel Gazete
28 Mayis 2003-06-12
Moise Rahmani, Fondator de la revista "Los Muestros" mos aregala de dos muevas ovras
Klara Perahya
Moise Rahmani a permis a Noa de donner une magnifique réponse, digne juste, parfois bouleversante.
Il fallait écrire ce livre. C'est une contribution a la Vérité.
(Sénateur Philippe Monfils)
Despues de aver eskrito sus tres primeros livros "Un pan de notre mémoire", Shalom Bwana" i "Les juifs du soleil", Moise Rahmani mos da dos otras ovras "La réponse de Noa" i l'Exode oublié", todas las dos eskritas en la lengua del Payis en el kual el autor bive.
Este maraviyozo dinamizmo mos da la mezura del pentensyal de enerjia del eskritor, e kual tyene tambyen la karga pezgada de publikar regolarmente la revista byen konosida "Los Muestros" de lakuala el es el fondator i el kapo redaktor.
Uno de los grandes meritos de Moise Rahmani es de luchar para mentener biva la memorya djudia en ke situasyon ke sea, pozitiva o negativa.
"Saver observar, ver i transmeter' es su eskopo, komo un dever de reminisensya i en mizmo tyempo de akavido.
Es puede ser el suerte del puevlo judyo, de syempre dever ser vijilente i en mizmo tyempo de syempre ser solidaryo a kualkyer akontesimyento ande la persona se topa en perikolo.
Kon su kudyo permanente de no deshar nada pasar sin notifikar, el autor de estos dos livros ekspresa un pedaso de la alma djudia eya mizma, en su eternal prekaridad i en mizmo tyempo en su veluntad persistente de syempre sobrebivir.
Komo lo dize el Senator Philippe Monfils, el livro entitulado "La Réponse a Noa" es una vehemente defensa de Israel atakado indjustamente en la europa aklarada ipartikularmente en Beljika.
Ayudandose de shifros, datas, reproduksyones de grafites i multiples otros testimonyos, Moise Rahmani lucha kontra la deznformasyon ansi kel antisemitismo en informando el publiko sovre la verdadera situasyon del konflikto Israelo-Palestinyano.
En su otro livro : "L'Exode oublié", Moise Rahmani mos konta la historya de la Komunidades djudias ke bivyeron durante 2000 anyos en diversos pauizes arabos i ke fueron arrondjados de ayi a la siguida de la gerra de 1948. El apunta kon razon ke serka de un millyon de muestros korelijyonaryos desharon aya sus byenes fortunas.
Este lavoro, el autor lo dedikaso a sus payentes i tambyen a los 940.000 djudyos arrondjados de los payizes arabos o ovligados de desharlos.
Se puede afirmar ke kon estas dos ovras, Moise Rahmani kita a luz munchos evenementos de los kualos el rekuerdo korre el reziko de despareser en el remolino loko del tyempo. Ainsi el kumple el sakro dever de mentener biva la Memorya Djudia afin ke nada kayga en el olvido.
Klara Perahya
|
