SHALOM ? Istambul
17 juin 2002
Un livro eskrito en proz-lirik es de Moise Rahmani ? Shalom Bwana, la saga des Juifs du Congo.
Un livro me paso a la mano. Es el livro de Moise Rahmani emprimado por Romillat, 'Collection Terra Hebraica'. Ya savemos ke Moise Rahmani es el editor de la revista 'Los Muestros' ke es la boz de los Sefaradim. I antes poko tiempo Rahmani emprimo "Rhodes, un pan de notre mémoire", ke fue tambien un livro eskrito kon el korason.
En vista i antes de dezirvos mis sintimientos por este livro vos dare el adreso de ande se puede prokurar ; Moise Rahmani, 25 rue Dodonée ? 1180 Bruxelles ? Gelçika. I este mizmo livro se esta vendiendo en Paris durante el kongre judeo-espanyol organizado por la UNESCO i tambien esta en los magazenes de livros espandidos en el mundo. Kosta kaji 25 euros kon el koste de la posta.
SHALOM BWANA empeza kon photos del Congo i una entroduksyon de André Chouraqui onde el dize en rezume : 'Kerido Sinyor Rahmani, Te rengravo por Shalom Bwana, la saga des Juifs du Congo'? Es enteresante de meldar el humor ke mete en tu eskrito. Yo me akodri de los viajes ke ize a esta vieja kolonia belge. LA vijiti en 1952 a la fin de otro viaje. Es el prezidente René Cassin ke me emkorajo a ir asta el Kongo Belge. No me puedo olvidar la manera ke fui resivido ? Todo lo eskrito en este livro Shalom Bwana fue bivido. I kon este livro lo bivi todo otra una vez. Sos el primer eskrivano ke konta de la 'Afriue Noire'. Achakes de este livro tambien vide en mi memoria amigos i keridos. Munchos saliedron i se fueron a otros payizes i entremientes a Israel. Kaliya guadar la memoria de este pedaso de historia?' André Chouraqui felisita Rahmani por su talente de eskravano.
Rahmani mos konta el Kongo de antes 100 anyos i viene asta oy? El aze deskripsyones de amigos, de figuras importantes i non emportantes. Mos konta Kongolezos, amigos, famiya kon un tono yeno de maor i karinyo. Ay un mundo ke eskapo i ke unka se va rekonstruizar. Ni la cente son las mizmas, ni las kayes, ni las sivdades. Ay tambien famozos entre eyos, personas ke es emposivle ke salgan de la memoria. Es la vida de los Cudios del Kongo en akeyos anyos.
Los emportante es ke en meldando SHALOM BWAna vos estaj sintiendo en vuestro payis.
No es mas el Kongo, sino ke es la Turkia. Lo mizmo bivmos aki, lo mizmo sintimos aki. Los mizmos faktos, los mizmos sintimyentos da bueltas en meustros korasones. La koza es ke muy pokos d'entre mozos se pueden prononsar a escrivir kon tant sensibilitad. El spleen, la nostalji esta kada fraza, en kada palavra. I despues de meldar kada pedasso, tenej menester de un sierto tiempo para mirar atras sovre vuestro passado. Este livro es una memoria. Es la memoria de todos mozos, de kaji todos los Sefarades del mundo. En meldando i yo veyo en este livro, yo Sefarad de Estambol. Puedia ser i.Sefarad de Fransa, de Gresia, de italya, de?de?Se eskapa kon un regreto ke Moise Rahmani save eksprimar. Es una palpitasion, es un sospiro de ariento muestra alma, es de lo ke no mos rendimos kuenta i ke estava durmiendo en el fondo de muestro ser, es esto todo i mucho mas ke remeneyo Rahmani. Los mizmos nombres de amigos tenemos. I yo tengo Salamon, Avram, Naim, Victor Joseph, Bohor, Jak,? des vezes mizmas alkunyas.El mizmo korazon triste, el eskarinyo i tambien karinyo, el mizmo arepentir? sentimos i mozos en Estambol, en Selanif, en Dubrovnik, en Paris? Yo no konosko el Kongo, nunka no estuve asta oy. Pero Moise Rahmani kon todos los otros me eskrivyo i a mi sin darse a sentir. Yo esto en su livro encuntos kon la Kula de Galata, kon el Kal de los Frankos, kon mi mama avlando dia i noche el Judeo-espanyol kon mil i una dicha ke arekoji komo la ormiga, i peleyandose kon mi papa en judezmo, mis padres, mi gramama en la punta de la suvida, todos los amigos, esta Cuderia ke mas no ay.. no ay? no ay? no.. no.. nunka mas avra.
Todo esta dicho kon una profunda muzika.
SHALOM BWANA, es una roz-lirik. Moise Rahmani ed mas kes un eskrivano. El es un Poeta. Shalom Bwana es un kante de amor?
Beki Bardavid
|
