SHALOM ? Istambul
24 juin 2002
Klara Perahya
SHALOM BWANA la saga de los djudyos del Congo el de alkavo livro de Moise Rahmani
I seras un egzempyo para las nasyones (deut.19
Despues del ermozo artikolo le Beki Bardavid, ke paresyo en el Salom del 17/7, me kesa poko de dizir propozito del livro entitulado Shalom Bwana ; ma me es imposivle de guadrar el silenzyo, Moise Rahmani es un eskritor ke personalmente apresyo muncho, su ovra es muy interesante, tanto del punto de vista humano ke historiko.
"Shalom Bwana" es un dokumentaryo, el kual salva del olvido faktos i detalyos de la vida kotidyana de una komunita djuydia en tyerras ajenas, tyerras eyas mizmas debasho la mominasyon de una otoridad estranjera.
En su prefasya, Moise Rahmani mos dize : "Los rekuerdos asemejan a la mmecha ke asendemos noche de Shabat, la azete ke esta en riva simboliza los buenos "souvenires", los negros kedan debasho, aogados en la agua".
Kon su indeniavle talento, el eskritor supo azer arrebivir delantre de muestros ojos, komo un filmo de sinema, la vida de kadal dia de munchas famiyas djudias del Kongo Belijkano, la mas parte orijinaryas de la Isla de Rhodos, reskapadas de la Shoa.
A travers sus rekuerdos, Moise Rahamni mos trasa de mano de maestro, lo ke fue la egzistensya de muestros korelijyonaryos, en esta parte de la Afrika ekuvatoryal, kon sus altas i sus bashas, i en mizmo payis antes de devenir "El Zaire" estado libero, de ke eran sus personajes politikos i sus relasyones estrechas kon la Komunidad Djudia, la kuala fue el motor de la ekonomia kongoleza.
Es puede ser la kavza por la kuala el Zaire (muevo nombre del Kongo Beljikano) fue el primer payis Afrikano ke renovelo sus relasyones kon Israel, despues de la guerra de sej dias, i ke manifesto su admirasyon por el Estado Hebreo, preferando su ayudo tekniko a akel de las grandes potenzyas de la Europa i mizmo de los Estados Unidos.
A este rpopozito el autor mos konta lo siguente : "En los anyos 1970, uno de los kapos de la provensya de KASAR manifesto a la Komunita Djudia el dezeo de 6000 myembros de su trivo de konvertirsen al Djudaizmo. Syestos de entre eyos pretendyeron mizmo ke los trivos yamados "TUTSI" eran desendyentes de la falashas djudyos de Ethyopie.
Esta demanda de koversyon no pudo malorozamente ser kontretizada por razones tokando a la otoridad relijyoza de la Eglisya i tambyen por razones politikas.
Oy en dia, lo ke kedo de los dos a tres mil ( 2 a 3000) djudyos ke ayudaron a la formasyon del Zaire, es solo 30 o 50 personas, konsentradas en la kapitala "Kinshasa".
La reflesyon sosyo-analitika de Rahmani es profonda. El mos dize lo siguiente a propozito de la influensa tan pozitiva de la aktividad djudia en varios payizes :
"? le juif dont la vie et l'histoire présentent un caractère si particulier, et dont le travail est une efficience telle que, partout ou il s'exerce, il pénètre jusqu'aux racines par lesquelles la sève de l'évolution et du progrès se communique à toutes les branches de l'activité sociale?"
(? eldjudyo, delual la vida i la histotorya prezentan un karakter tan partikular i de les de una tala efisensya ke en todo lugar ande el se egzersa, el penetra asta las raizes po ande el sevo de la evolusyon i del progreso se espande a todos los ramos de la aktividad sosyal?)
Moise Rahmani konfirma ansi el grande rolo ke los djudyos jugaron en kuala parte del mundo ke sea, para el desvelopamyento kultural, syentifiko o sosyal.
Ansi fue de los nombrozos komersantes djudyos en el Kongo Beljikano (ZAIRE) ke ivan de kazal en kazl vender sus ropas i en mizmo tyempo komunikar a los kazalinos ke bivian leshos del sentro, las ideas i los konseptos del mundo oksidental, elkual ya avia ayegado a un syerto nivel de sivilizasyon i de adelantamyento.
En su prefasya, Andre Chouraqui mos dize ke este livro arrebive, en kada uno de sus lektores, rekuerdos medyos enterrados, en la bruma del pasado, es verdad, ma a mi pareser, el es tambyen otra koza mas, el es poko la historya del imenso esforso del puevlo djudyo, el es la prova de la enrejia irrdeduktivle de su aktividad, i en mizmo tyempo un reflekto de su destino echo kontinualmente de luchas ke no eskpan, de impedimyentos a trespasar, de obstakolos a abatir?kon el unilo apyo de la imensa solidaridad entre sus myenbros espasidos a las kuatro partes del mundo, i la konviksyon ke mas aya, se topa un espasyo luminozo, al kual kada uno no peude, alkasar ke solograsyas a su propryo konbate.
Klara Perahya
|
