SEJ LIVROS SEJ TESTIMONYOS
Klara Perahya
Moïse Rahamani, Prezidente del "Institut Sépharade Européen", Fondator i kapo Editoryalisto de la Revista "Los Muestros" vyene de publikar en Bruxelles un sejen livro de un grande interes aktual : "Sous le joug du Croissant, Juifs en terre d'Islam" (Debasho la dominasyon del kreshente, djudyos en tyerras de Islam)
Kon esta ovra, el presigue el periplo istoriko del puevlo djudyo, esta vez a travers los payizes arabos : Yemen, Pakistan, Aljeria, Maroko, Tnizia etc… desde el primer milenaryo de muestra era asta oy en dia..
Investigador eskrupulozo, luchador ardyente para la mentenensya de la memorya sefardi, Moise Rahmani baza su lavoro sovre rezultados de enjkuestas, estatistikas, testimonyos orales o eskritos i mos trasa ansi el tablo de lo ke fue el destino dolorozo de muestroos ermanos trespizados debasho rejimes diktatoryales en tyerras arabas kaji syempre ostiles.
En la introduksyon meldamos estas palavras de Albert Memmi, kel otor mos sita :
"L'ensemble des victimes des pogroms Russes, Polonais et Allemands, n'excède probablement pas l'ensemble des petits pogroms successifs perpétrés dans les pays arabes".
( Probablamente, la totalidad de las viktimas de los pogromos Rusos, Polonezes i Almanes no trespasa la totalidad de los chikos pogromos suksesivos ke fueron perpetrados en los payizes Arabos")
Fue un aborresimyento sin razon, un menos presyo perpetual… el desdenyo cruel del dominator enverso el dominado, en su esforso de rudezirlo a la ejemonia de su sola kreensa.
A parte raras epokas de amistad i de merveyoza kolavorasyon intelektual muy fruktuoza, los djudyos bivyeron sovre las tyerras arabas, en el espanto i la prekaridad, konsiderados la mas parte del tyempo komo kriansas manas de segunda kategoria.
A este propozito (en el eskopo, penso, de bushkar las razones profondas de esta rankor ineksplikavle) Moise Rahamni se refera a nombrozos pasajes de la literatura Araba, yenos de akuzasyones umilyantes (alçaltici) enverso muestros korelijyonaruyos: "… Le prophète connaissait l'intention traitresse qui habitait les âmes des juifs…" (Education islamique 6e année. P.127) (… el profeta konosia la intisyon perfida (hain) ke se topava en las almas djudias) "…Les enfants d'Israël n'avaient pas d'estime pour les prophètes. Ils en tuèrent certains et attaquèrent les autres, comme ils firent à Moïse, que la paix soit sur lui, quand ils l'accusèrent d'avoir tué Aron…(Education islamique 10e année p.171-172) (… los ijos de Israel no tenian estima por los profetas…eyos mataron svertos de entre evyos i atakaron los otros, komo lo izyeron por MOSHE, ke la paz sea sovre el, kuando lo akuzaron de aver matado Aaron…)etc…etc…
Por mankura de lugar, no tengo la posivilidad de komunikarvos todo lo ke esta literatura komporta de falsas akuzasyones enverso el puevlo djudyo.
Esta akumulasyon de prejuisyos (önyargi) negativos i de inkulpasyon kontiual, sin ninguna justifikasyon, intensifiko, po seguro, en el korason slamilo un estado de malkerensya i de ostilidad al eguardo de muestros ermanos, asta la negasyon de sus derechos los mas lejitimos.
"Azer la luz sovre todo esto" es una nesesidad imperativa; ansi, despues de la lektura de este livro, la realidad mos aparese mas klara… i munchas kozas muy dolorozas son mijor entendidas.
En la epoka prezente ande las verdades son formuladas a mitad i devyenen de este modo mentiras terrivlemente danjerozas en esta epoka ande nombrozos aspektos de la realidad son deshados voluntaryamente en la eskuridadkon, Moise Rahmani mos ayuda a djuzgar de una mas djusta.
|
