Aki Yeryushalyim, N° 76, Jerusalem, novembre 2004

Esparzidos en sienes de komunidades en las kuatro partes del mundo, los sefaradis do oy dia biven, en la mayoria de los kavzos i kon la sola eksepsion de Israel i Turkia, en komunidades chikas i marjinales en komparasion kon las otras komunidades djudia. Djuntos kon esto eyos estan tomando konsensia del fakto ke son eredores de una rika tradision istorika, relijioza i kulturala, i ke kale luchar enerjikamente para ke esta tradision no despareska.

El livro "Sepharades 2004" de Moise Rahmani mos da una imajen panoramika de estas komunidades, segun el paiz onde se topan, la istoria partikulara de kada una de eyas i sus situasion oy dia.

Despues de una kurta revista istorika en la kuala eksplika ke es la rayiz del termino "sefaradi", ansi ke onde i komo se krearon las komundiades sefaradis despues de la ekspulsion de Espanya, el mos da en kurtas palavras una deskripsion de estas komunidades en kada paiz onde uvo o ay ainda sefaradis, de Australia en el Este asta las Amerikas en el Oeste i desde Afrika del Sud asta Ingletierra en el Norte.

Los tres ultimos kapitolos, antes del ke trata de sus konkluziones, son dedikados a la Shoa, a sus konsekuensas dezastrozas para el mundo sefaradi, su kultura i la lengua djudeo-espanyola i enfin a lo ke es, sigun el, "Ser sefaradi oy dia" (ver, en paj. 5, la traduksion al ladino de una seleksion de este kapitolo)*

Este es un livro ke sin ser un estudio akademilo kon estatistikas i analizas istorikas i sosiolojikas, eushe a darmos una idea bien klara i inkluziva del mundo sefaradi en muestros dias i, segun las palavras del autor, puede enkorajar al lektor sefaradi a la refleksion i a la investigasion de su kultura.

* SER SEFARADI OY
Moïse Rahmani

En su livro "Sepharades 2004 – Un état des lieux" el autor, Moïse Rahmani, inkluye un kapitolo en el kual trata de definir lo ke, segun el, es "… ser sefaradi oy". De entre estas definisiones eskojimos i traemos aki, en traduksion al ladino, las ke mos paresen reflektar, mijor ke otras, la esensia del sefaradi en muestros dias.

Ser sefaradi oy, es yevar en si mizmo un poko de esta peninsula iberika ke, en un triste momento de su istoria no kijo saver mas de mozotros; es remplasar el rekuerdo doloriozo de Fernando i Isabel por un otro, mas antiguo –el de Alfonso VI, el imperador de las tres relijiones.

Ser sefaradi oy es tener en si esta hidalgeria, esta nobleza de kavayeros ke forma la ermozura de la Tierra de Sefarad, siempre kerida por muestras almas i ke 500 anyos de absensia no la izieron olvidar de muestra memoria kolektiva. Segun lo fue afirmado por un notable orijinarion d'Estambol, kale saver ke kada sefaradi es un prinsipe, ma sin nunka olvidar ke ser prinsipe krea doveres i no mos akorda mas ke el derecho de servir; i si vezes el sefaradi mira al otro d'enalto es para mijor ayudarle a alevantarse.

Ser sefaradi oy, es mantener el ladino, el trezoro kultural ke tomaron kon si los djudios ekspulsados de Esapanya en 1492. Es avlar esta lengua i enrikeserla komo toda otra lengua biva.

Ser sefaradi oy es provar de ser komo maestros antepasados, un ponte entre las sivilizasiones. Es ke muestros ansestros, en la Eskola de Tradukotres de Toledo, no fueron el sinyo de union entre las sivilizasiones latina i arba, traendo a la una i a la otra el konosimiento i la saviduria?

Ser sefaradi oy, es akdrarse, sin vanidad, ke muestros grandes poetas i pensadores, ke salieron de esta tierra de la kuala avlaron kon dulsor, kontribuyeron a su grandeza. Es provar a segir, al tanto ke puedamos, sus trasas.

Ser sefaradi oy, es vibrar por su istoria, es transmeter su kultura, es afirmarse universal.

Se sefaradi oy, es saver respektar a otros. Es ser empapado de una doble o triple kultura I aver echo una sinteza muy partikulara, la muestra.

Ser sefaradi oy, enfin, es komo ser la sal ke da la savor al pan. Los kristianos son la arina i los muzulmanos la levadura, o ke es a la kontra ? De esta union nase el pan. Los sefaradis son la sal, grasias a la kuala el pan tiene una mijor savor.