TRESER LIVRO DE MOISE RAHMANI
" LES JUIFS DU SOLEIL"
Beki Bardavid
Ariento de muy poko tyempo, ya es el treser livro ke Moise Rahmani esta
publiando.Ya es el treser livro kon el kual Rahmani mos enkanta, mos
maraviya kon su stil, kon su manera de eskrivir, kon su soceto, i sovre
todo kon su kante de amor, este kante ke oyemos en el korason, i ke no se oye
kon nada mas, solamente se siente ariento del ser.
Ya savemos ke Moise Rahmani mos ofrese una revista maraviyoza intitulada
"Los Muestros", espartida en el mundo entero dizde dodje anyos, i en tres
linguas, en français, en judéo-espagnole i en inglez. Atado a la kavza Djudia,
Moise Rahmani dirija el Insituto Sefarad Evropeo, i tambien mantiene el sit
djudio uno de los mas apresiados en la Evropa:www.sefarad.org
Aparesyo "RHODES, UN PAN DE NOTRE MEMOIRE"; éditions Romillat,
antes unos kuantos mezes.
Enverano tuvimos otro un livro "SHALOM BWANA"; La Saga des Juifs du
Congo?, publiada por la mizma edisyon Romillat, ke fue vedra una ovra eskrita
en proz-lirik , asigun lo dishe en el Shalom del l7.7 2002.
Agora tuvimos el plazer de resivir "LES JUIFS DU SOLEIL, portraits de
Sépharades de Belgique". Es publiado por Filipson Editions.
El livro en si-mizmo esta luzyo, ermozo en su kolor, en su papel, en su
emprimeria, kon un shaday en la kacha ke se eskonde en la solombra del sol,
palavra tomada de su titolo.
esta vez tambien tenemos la Prefasa de André Chouraqui, avlando del "Muevo
livro de Moise Rahmani, Les Juifs du Soleil, portraits de Sépharades de
Belgique. Es un livro ke se nota en la tradision del orientalismo hebraiko, kon
su profetizmo, kon su mesianizmo ke es la esensia de la Torah, de la Biblia i de
las relijiones ke nasieron despues".
De mizmo Julien Klener, presidente de los Israelitos de Beljika, empesa su
entroduksion kon una demanda: "Otro un livro konsernando el Judaismo?. "
respondio el-mizmo a su demanda: "Siguro ke si, siguro ke no".
I acusto Kleiner : "Mizmo ke se avla de estos problemas en tanto livros, el
kontenido spesifik es enteramente orijinal".
Este livro trata de los Djudios Sefarad de Beljika, kada uno kon su historia, kada
uno kon sus penas, sus alegrias, vidas diferentes las unas de las otras en
raporto kon las desepsyones, las trajedias, los trales ke paso el siglo 20.
Vedra ke ay pajinas ke vos parese ke estaj en Estambol. De aya sale una historia
del mundo Djudio, i vos olvidaj ke estaj en los payizes Evropeos o Afrikanos. .
En empesando kon un poko de historia en jeneral, Rahmani mos konta
Auschwits, las gerras, los afitos, las vinidas del Congo, ... i tambien todo lo
bueno, asta los balos Sefarad, ke le desharon la savor en la boka.
El livro kontiene 232 ojas i kosta 23 euros. Se puede demandar de los numeros:
GSM: 0474 98 67 70 - Fax: 02 210 89 59 .
Devemos de konoser a Moise Rahmani, para entender komo eskrive estas ovras,
kon una lingua tan kompleta, tan perfekta, kon un français tan puro. Rahmani es
un entelektüel ke empeso la vida kon Verlaine i Baudelaire, kon el mas alto
grado de lirizmo.
Sus livros son perfeksiones en todo los kampos.
Otra una vez i kada vez kale ke lo diga: Moise Rahmani es un poeta.
LES JUIFS DU SOLEIL es eskrito en PROZ LIRIK.
|
